Angel, ayaw nagpapakuha ng picture ‘pag tumutulong

PAGDATING sa pagtulong ay hindi matatawaran ang kabayanihan ni Angel Locsin dahil hindi pa nga siya halos nakakapahinga sa biyahe mula Japan ay heto lumipad na naman siya patungong Catarman, Samar na maraming sinirang kabahayan ang bagyong Tisoy at nawalan din ng magpakukunan ng pang-araw-araw na kakainin dahil pati mga alagang hayop ay nawalis.

Nitong Disyembre 6 lang dumating si Angel galing Japan na dumalo sila ni Neil Arce ng kasal nina Vhong at Winona Navarro. Nag-extend ng bakasyon ang magsing irog para magkaroon ng oras sa sarili at manood ng concert ng U2 na bucket list ng aktres simula bata pa.

Madaling araw ng Disyembre 7 ay lumipad na patungong Samar ang aktres kasama ang kaibigang taga-NGO na laging kasa-kasama sa paglilibot niya sa buong Pilipinas pala mamahagi ng tulong. Wala kasing kakilala si Angel sa mga lugar na pinupuntahan niya.

Ayon sa grupo na nakakasama ng aktres, “Lagi niyang kasama ‘yung isang friend niya, full-initiative naman ni Angel pero wala siyang alam masyado sa lugar kaya nagpasama siya. Kasama niya rin ‘yun dati sa Davao.”

Inalam namin kung magkano ang budget ng aktres sa bawat lugar na hinahatiran niya ng tulong, baka sakaling sagutin kami, he, he, he.

“Ayaw po niya pasabi, basta’t sapat lang po, ‘yung abot lang ng kaya niya,” sagot sa amin.

Nagpapa-email kami ng litrato pero tumanggi ang aming kausap dahil mahigpit na bilin sa kanila ni Angel na no pictures at kung mayroon man ay pam-personal na kopya lang.

“Kaya nga po nagtatakip siya ng mukha kapag may ganito kasi nakukunan pa rin po ng picture,” say sa amin.

Mabuhay ka Angel, sana maambunan ka, mala Gremlins para maraming tumulong din sa mga nangangailangan.

FACT SHEET
ni Reggee Bonoan