Boy 2 at Neil, abala sa limang pelikulang ipo-prodyus

SA huling panayam namin kay Neil Arce sa ginanap na #PPPGrandLaunch2019 ay inamin nitong marami silang pelikulang naka-line up ni Boy 2 Quizon.

“Alam mo maraming naka-line up, eh. Hindi ‘yun matutuloy kung hindi natin alam. Mahirap magbitaw kung ilang number of films kasi kahit magplano kami ng 20 films, depende pa rin ‘yan sa schedule ng artista, sa director sa ganyan, so hirap magbitaw ng numbers. So far right now, tatlo na ang nakakasa tapos early next year 2 (films),” sabi sa amin.

Aminadong mahirap ding maging producer, “mahirap!  Nakaka-stress!”

Kasama si Neil sa N2 Productions na itinatag nila ni Boy 2 at katuwang nila ang Spring Films para sa pelikulang I’m Ellenya L na kabilang sa 3rd Pista ng Pelikulang Pilipino entries na mapapanood simula Setyembre 13-19 sa Metro Manila.

Ito rin ang unang directorial job ni Boy 2.

Samantala, may nabasa kaming ibinebenta ang warehouse ng Arce Dairy sa may Balintawak Quezon City at pinabulaanan ito ni Neil. Ang kilalang ice cream ay pag-aari ng tatay ni Neil na itinatag ng kanyang lolo Don Ramon Arce Sr. noong 1935.

Ang tatay na ngayon ni Neil ang may-ari ng Arce Dairy at sa tanong namin kung bakit hindi siya sumosyo, “Mas gusto ko ng sariling negosyo para iba, at saka bago palang ako ipanganak mayroon na ‘yun (Arce Dairy Ice Cream), naitayo na,” katwiran ng binata.

Dating poker player si Neil at nagka-interes sa pagpo-produce ng pelikula kaya ito ang pinagkaka-abalahan niya ngayon kasama ang mga kaibigan.

FACT SHEET
ni Reggee Bonoan