HATAW! D'yaryo ng Bayan hatawtabloid.com
READ: Adrianna, excited mapasali sa Cinemalaya at Pista ng Pelikulang Pilipino
MATAGUMPAY ang ginanap na Gala Night ng pelikulang School Service ng BG Productions International na pinagbibidahan ni Ai Ai delas Alas, punong-puno ang Cultural Center of the Phillipines last Sunday.
Todo ang suporta ng marami kay Ai Ai, kabilang ang pamilya at mga kaibigan ng Kapuso comedienne. Nandoon din ang mga kasama niya sa GMA-7 at BG Productions International sa pangunguna ng lady boss nitong si Ms. Baby Go.
Masaya si Ai Ai sa pagtanggap ng manonood sa kanyang ipinamalas na performance rito na nanlilimahid at kakaiba ang itsura. Dusa rin sa part niya na kinuhaan sa busy streets ng Metro Manila ang kanyang bagong pelikula.
Nagpahayag ng sobrang paghanga ang award-winning director nitong si Louie Ignacio at si Ms. Baby sa husay na ipinamalas na performance rito ni Ai Ai.
“Expected ko na ito na makabuluhan itong movie, story ito ng buhay ng mga bata na palaboy-laboy sa lansangan. Na ‘pag nakita naman natin, talagang dinudurog ang mga puso natin,” wika ni Ms. Baby.
Mananalo kaya ulit si si Ai Ai ng award dito, tulad sa Area? Sagot niya, “Feeling ko naman mananalo siya ulit, kasi magaling siya rito e. And siyempre, lahat naman ng movie niya sa BG Productions ay magaling siya, e.”
Saad naman ni Direk Louie, “Kay Ai Ai kasi, kailangan niya ng iba naman, hindi ‘yung pare-pareho ‘yung ginagampanan niyang role. Sa tingin ko siya ‘yun, kayang-kaya niya ‘yung role.”
Nalagpasan ba ni Ai Ai ‘yung performance niya sa Area? “Magkaiba, pero I think yes, kasi marami siyang ano, maraming transformation… ‘yung character niya rito, mapapanood ninyo, ibang klase talaga,” pakli ng Kapuso director.
Ang School Service ay nagpapakita ng buhay ng mga batang namamalimos at gumagawa ng raket sa kalsada na hawak ng sindikato. Ito ay sumasalamin sa survival na nangyayari sa animo gubat na kalsada, na malupit sa mga kapos-palad at naghihikahos ang buhay.
Mapapanood ang School Service mula August 12. Tampok din sa pelikula sina Direk Joel Lamangan, Therese Malvar, Joe Gruta, Felixia Dizon, Kevin Sagra, Kenken Nuyad, Ace Cafe, Sandino Oriquel, at Celine Juan na introducing sa pelikula.
ALAM MO NA!
ni Nonie Nicasio
