P3-M alahas natangay ng Dugo-dugo sa Cainta

TARGET ngayon ng Cainta PNP ang kuha ng CCTV-camera sa Pureza St., Sta. Mesa, Maynila para mahuli ang kilabot na miyembro ng “Dugo-dugo gang” na tumangay sa higit P3 milyong halaga ng mga alahas ng isang pamilya sa Cainta, Rizal.

Sa salaysay ni Jun Sanchez sa pulisya, laking gulat niya nang makitang bukas na ang kanilang vault at wala na ang mga ahalas nilang mag-asawa na umaabot sa P3 milyon.

Nabatid sa pulisya, dakong 11 a.m. kamakalawa, nakatanggap ng tawag sa telepono ang kanilang kasambahay na si alyas Tina.

Ayon sa tumawag na isang babae, siya ay sekretarya ni Sanchez na nakabundol ng bata at inutusan siya para kunin ang mga alahas bilang pampiyansa.

Sinabi ng babae sa kasambahay, nakakulong ang amo niyang lalaki habang ang among babae ang siyang nagbabantay sa bata na isinugod sa ospital.

Bunsod nito, winasak ng kasambahay ang vault, kinuha ang mga alahas at ibinigay sa babaeng nakausap sa telepono sa pinagkasunduan nilang isang lugar sa Pureza St., Sta Mesa, Manila.

Babala ng pulisya, mag-ingat sa kilabot na mga miyembro ng “Dugo-dugo gang” at agad itawag sa pulisya ang ano mang uri ng modus na maaaring nangyayari.