HATAW! D'yaryo ng Bayan hatawtabloid.com
HARD TALK
ni Pilar Mateo
KAPAG sinabing Noel Cabangon, isang kanta ang maaalala mo sa kanya. Ang Kanlungan.
Dekada ‘80, sinusubaybayan na ang gigs niya kasama ang bandang nabuo, ang Buklod.
Umalagwa sa mundo ng musika ang kanilang tugtugan.
Nag-trivia nga ako. Na noong panahong ‘yun, ang isang kanto sa Timog na kinatatayuan na ngayon ng isang sikat na condominium ay kinalalagyan ng isang tila burol na may bar, ang Pook Luntian. Musikahan sa tuktok ng isang ‘di naman kaataasang tila maliit na bundok sa gitna ng kalunsuran. Doon sinundan si Noel ng kanyang mga tagasubaybay. Kasama ako!
Isa pa, sa hindi kalayuan sa Pook Luntina, roon din sa Timog, sumulpot ang Spindle Bar na dinaanan din ng musika ni Noel at mga kasama. At ngayon, isa ng simbahan (St. John The Apostle) na ito na narinig din ang tinig ni Malu Barry na naging watering hole rin ng yumaong direktor na si Lino Brocka.
Maraming memories. Na kasalli sa pagsakay ni Noel sa hindi niya na maiiwang karera.
Nagtuloy-tuloy sa kanyang musika si Noel. At iisang daan lang ang sinusunod nito sa perspektibo ng kanyang mga awit. Marubdob. Lalo na kung tungkol sa matitinding usapin o bagay. Kalikasan. Takbo ng bansa.
Pero dumating ang panahong kailangang mas taasan ang lipad ng galaw at tono ng kanta.
Bagong album. Sa Biyahe. At patuloy na tinandaan at kinilala ang ngalang Noel Cabangon.
Iconic. True legend sa Philippine music scene.
Kahit may mga panahong kinudlitan, hindi naman nawala ng tuluyan sa eksena si Noel at ang kanyang gitara. Dahil kasama siya sa nangangalaga sa kapakanan ng mga musikero at kompositor sa kanilang samahan.
At sa Setyembre 20, 2025, sa Music Museum, kasama sina Faith Cuneta (ang Asia’s Queen of Telenovela Theme Songs), Cye Soriano, Patricia Ismael, Miles Poblete, Dindo Fernandez, Marianne Bermundo, Samuel Smith, Rafael Mamforte, Meggan Shinew, Justin Herradura, at Nadj Zablan ay aawit sa Songs of Hope sa isang concert na hatid ng produksiyon ni Richard Hiñola(na naghandog ng BEST Awards) at ng Prime Lens Film Productions for a good cause. Sa direksiyon ni Lim Luther John.
Hayaan nating iduyan tayo ng mga awiting umaasam, nangangarap, umaasa sa iba’t ibang ikot ng ating buhay.
