HATAW! D'yaryo ng Bayan hatawtabloid.com
NASAKOTE ang pitong indibidwal matapos maaktuhan ng mga awtoridad na naglilipat ng kahon-kahong ‘hot meat’ sa isang truck sa isinagawang operasyon sa bayan ng Marilao, lalawigan ng Bulacan, nitong Miyerkoles, 17 Agosto.
Batay sa ulat ni P/Lt. Col. Jordan Santiago, hepe ng Marilao MPS, dakong 10:30 ng gabi kamakalawa, habang nagsasagawa ng roving patrol ang Barangay Peacekeeping and Action Team (BPAT) ng Brgy. Sta. Rosa 1, kanilang naaktuhan ang isang wing van truck na may plakang plaka NHE4570, na naglilipat ng hinihinalang double-dead meat sa isang refrigerated van na may plakang CBP1065.
Agad nilang ipinaalam ang insidente sa National Meat Inspection Service (NMIS) at sa Marilao MPS Station na nagresulta sa pagkakaaresto ng mga suspek.
Nasamsam sa operasyon ang 435 kahon ng hot meat na tumitimbang ng humigit-kumulang 12,500.8 kilo at tinatayang nagkakahalaga ng P2.3 milyon.
Pansamantalang itinurn-over ang mga kontrabando sa Marilao MPS at kalaunan ay ilalagak sa NMIS para sa tamang disposisyon.
Kasalukuyang nasa kustodiya ng pulisya ang mga suspek at inihahanda na ang kasong paglabag sa RA 9296 (Meat Inspection Code of the Philippines) na isasampa sa tanggapan ng panlalawigang piskal sa Malolos, Bulacan.
Samantala, pinuri ni Bulacan PPO Provincial Director P/Col. Angel Garcillano ang mabilis na koordinasyon ng BPAT ng Brgy. Sta. Rosa 1, NMIS, at Marilao MPS na nagbunga ng pagkakaaresto ng mga suspek.
Tiniyak din niya sa publiko na lalo pang paiigtingin ng Bulacan PNP ang operasyon laban sa pagkalat ng delikado at ilegal na karne upang mapangalagaan ang kalusugan at kaligtasan ng mamamayan. (MICKA BAUTISTA)
