HATAW! D'yaryo ng Bayan hatawtabloid.com
SA PINAIGTING na anti-illegal drug campaign ng pulisya sa Nueva Ecija ay humantong sa pagkakaaresto sa isang ginang na nagtangkang magpasok ng iligal na droga sa isang detention facility kamakalawa.
Sa ulat mula kay PColonel Heryl “Daguit” L. Bruno, provincial director ng NEPPO, ang naarestong suspek ay isang 59-anyos na dishwasher mula sa Barangay San Isidro, Cabanatuan City.
Ang suspek ay naaresto matapos magtangkang magpuslit ng ipinagbabawal na substance sa Cabanatuan City Police Station Male Custodial Facility habang binibisita ang kanyang nakakulong na mister.
Bandang alas-5:15 ng hapon, sumailalim sa routine inspection ang suspek sa kanyang mga gamit at nadiskubre ng mga pulis ang isang heat-sealed transparent plastic sachet na naglalaman ng humigit-kumulang 0.3 gramo ng shabu, na itinago sa loob ng bulsa ng isang pares ng asul na maong na pantalon na balak ibigay sa kanyang asawa.
Agad namang inaresto ang suspek na ngayon ay nahaharap sa kasong paglabag sa Section 11, Article II ng Republic Act 9165 o Comprehensive Dangerous Drugs Act of 2002.
Ayon kay PColonel Bruno, hindi nila hahayaang makapuslit ang shabu sa loob ng mga kulungan o saan man sa Nueva Ecija batay na rin sa direktiba ni PBGeneral Ponce Rogelio I Peñones Jr., RD ng PRO3 na paigtingin ang pag-aresto sa mga drug personality sa buong rehiyon. (MICKA BAUTISTA)
