HATAW! D'yaryo ng Bayan hatawtabloid.com
NASAGIP ang walong Filipino habang nadakip ang 20 Chinese nationals sa pinaniniwalaang scam hub sa dalawang magkahiwalay na operasyon na isinagawa sa Clark Freeport Zone, lungsod ng Angeles, lalawigan ng Pampanga.
Ayon sa ulat, unang sinalakay ng mga awtoridad ang compound ng dalawang villa sa lugar kung saan nasakote ang 17 Chinese nationals.
Nakumpiska mula sa operasyon ang mga laptop at mga cellphone na nakatakdang sumailalim sa digital forensic examination upang makakalap ng impormasyon sa operasyon ng mga suspek.
Base sa mga chat na nakita sa isang computer, nakitaan ng mga awtoridad na nagpapahiwatig na nagpapatakbo ng love scam ang mga suspek.
Ayon sa mga Pinoy na nailigtas sa operasyon, higit walong oras silang nagtatrabaho sa loob ng hinihinalang scam hub sa loob ng isang araw.
Dagdag pa ng mga biktima, may kaibigan sila na nag-imbita lang sa kanila at pinahahanap sila ng mga kliyente pero aniya ay pinag-aaralan pa nila dahil isang linggo pa lang sila.
Ayon pa sa isang biktima, may pinahihintay sa kanila sa lugar na tao na hindi nila kilala samantalang hindi nakapagbigay ng pahayag ang 17 naarestong Chinese nationals dahil sa language barrier.
Kasunod nito, sinalakay rin ang isa pang residential property malapit sa mga villa kung saan inaresto ang tatlong Chinese nationals dahil sa pinaghihinalaang online fraud.
Dinala ang mga suspek sa Camp Bagong Diwa, sa lungsod ng Taguig habang sinusuri ng mga awtoridad kung konektado ang dalawang hinihinalang operasyon ng scam.
Ipinahayag ni Clark Development Corporation vice president for security retired Maj. Gen. Lina Sarmiento na sa loob ng Clark Freeport Zone simula 2023 ay ipinagbawal na ang anumang gawain na may kinalaman sa POGO.
Pinangunahan ang mga pagsalakay ng mga tauhan ng Bureau of Immigration, Armed Forces of the Philippines, at Clark Development Corporation. (MICKA BAUTISTA)
