Mag-dyowang tulak tiklo sa ‘obats’

ARESTADO ang dalawang indibidwal na pinaniniwalaang tulak ng ilegal na droga sa ikinasang buybust operation ng mga awtoridad sa Brgy. Camias, sa bayan ng San Miguel, lalawigan ng Bulacan, nitong Lunes, 21 Hulyo.

Sa ulat ni P/Lt. Col. Jowilouie Bilaro, hepe ng San Miguel MPS, dakong 4:37 ng hapon nang madakip ang mga suspek na kinilalang sina alyas Torpa, 33 anyos, at kinakasama niyang si alyas Melay, 27 anyos, matapos mahuli sa aktong nagbebenta ng hinihinalang shabu sa isang police poseur buyer.

Nakumpiska mula sa mga suspek ang pitong heat-sealed sachets ng hinihinalang shabu na may kabuuang timbang na 50 gramo at tinatayang nagkakahalaga ng P340,000; at marked money na ginamit sa operasyon.

Dinala ang mga suspek at mga nakumpiskang ebidensya sa Bulacan Provincial Forensic Unit para sa pagsusuri habang inihahanda ang kasong paglabag sa Sections 5 at 11 ng RA 9165 o Comprehensive Dangerous Drugs Act of 2002 laban sa mga suspek.

Ang operasyong ito ay patunay ng masigasig na kampanya ng Bulacan PPO sa ilalim ng pamumuno ni P/Col. Angel Garcillano, acting provincial director ng Bulacan PPO laban sa ilegal na droga at kriminalidad sa lalawigan. (MICKA BAUTISTA)