HATAW! D'yaryo ng Bayan hatawtabloid.com
AKSYON AGAD
ni Almar Danguilan
PANSIN n’yo ba na halos araw-araw ay may mga lumalabas na press release si Speaker Martin Romualdez. May kasama pang piktyuran blues kasama ang kung sino-sinong opisyal. May paanunsiyo ng kung anong plano. May pa-speech, pa-check, pa-turnover. Estilong approach ng Pangulo ng Filipinas, hindi ba?
Ano ba ang pakay ng estilong ito – mga larawan at headline? Ano nga ba? Mapapaisip ka talaga kung ano ang purpose. Trabaho ba talaga ang inaatupag o photo-op? Habang abala ang ibang opisyal sa paggawa ng batas, pagresolba sa krisis, at paghahanap ng solusyon sa inflation at kahirapan, tila ang Speaker ay mas abala sa pagpapakilala ng sarili. Bakit kaya?
Hindi naman tayo tutol sa pagpapalabas ng press release dahil hindi ito masama at masasabing bahagi iyan ng trabaho bilang opisyal at nakatutulong sa transparency. Pero kapag halos araw-araw ay may pahayag, may retrato, may self-congratulatory message pero walang kapansin-pansing resulta, roon nagsisimula ang tanong, “Para saan ba talaga ito?”
Hindi na lingid sa Kongreso ang ambisyon ni Romualdez na tumakbo sa mas mataas na puwesto – Presidente yata ang puntirya kung hindi tayo nagkakamali.
Ngayon kung pagbabatayan ang dami ng press materials niya nitong mga nakaraang buwan, tila nagiging “campaign platform” na ang Kongreso at hindi na pang-public service ang kanyang agenda.
Habang ang mga kababayan natin ay humaharap sa inflation dahil sa pagtaas ng presyo ng mga bilihin, kawalan ng trabaho, at krisis sa edukasyon, ang itinatampok sa balita ay ang panibagong photo-op ng Speaker. Puro porma, kulang sa substance. Puro pangako, pero nasaan ang tunay na implementation?
At huwag nating kalimutan na sa ilalim ng kanyang pamumuno, lumala ang imahen ng Kamara bilang “House of Crocs.” Ang Philippine Chamber of Commerce and Industry ay nagpahayag na marami silang nakikita na budget insertions. Nandiyan din ang kontrobersiyal na impeachment at power plays maging sa Senado. Pero imbes magpaliwanag, press release lang ang sagot.
“Ika nga, ang serbisyo publiko ay hindi Instagram feed. Hindi rin ito paramihan ng headlines. Ang tunay na lider ay hindi nagpapakyut. Dapat nagtatrabaho. Hindi nga ba siya nagtatrabaho? Kayo naman, nagtatrabaho rin si Speaker ha.
