HATAW! D'yaryo ng Bayan hatawtabloid.com
ISINAILALIM sa protective custody ng Philippine National Police (PNP) si Julie “Dondon” Patidongan alyas Totoy ang whistleblower sa kaso ng mga nawawalang sabungero.
Kinompirma ito kahapon ni PNP Chief, PGen. Nicolas Torre III.
Kasalukuyan aniyang nag-a-apply sa Witness Protection Program (WPP) si “Totoy” para matiyak ang kanyang seguridad.
“Pag siya ay nag-qualify (sa Witness Protection Program), itu-turnover namin siya sa [Department of Justice],” ayon kay Torre.
Ayon kay Torre, kilala at mayayamang tayo ang sangkot sa ibinulgar ni “Totoy” kaya kailangan ang mahigpit na seguridad dito.
Itinuro ni “Totoy” ang negosyanteng si Charlie “Atong” Ang bilang utak sa pagdukot at pagpatay sa higit 100 sabungero.
Samantala, sinabi ni Torre na nasa kustodiya na rin nila ang 15 pulis na sinabing sangkot sa pagpatay sa mga nawawalang sabungero, na ang may pinakamataas na ranggo ay isang Lt. Colonel.
Isinailalim sa kustodiya ang mga pulis bilang bahagi ng kanilang isinasagawang internal investigation.
“We are doing this with NAPOLCOM to ensure transparency and impartiality… para siguraduhin na ang hustisya ay makakamit,” ani Torre.
Sa katunayan, halos lahat na mga sangkot ay nasa active status.
“Lahat sila active… except for one na due for retirement at tatlong na-dismiss na dati,” dagdag ni Torre.
Tiniyak ni Torre na wala silang sasantohin at layunin nilang mabigyan ng hustisya ang mga nawawalang sabungero. (ALMAR DANGUILAN)
