HATAW! D'yaryo ng Bayan hatawtabloid.com
INARESTO ng National Bureau of Investigation -Organized Transnational Crimes Division (NBI-OTCD) ang dalawang babaeng pinaniniwalaang mga bugaw sa bayan ng Marilao, lalawigan ng Bulacan dahil sa sexual trafficking activities.
Sa ulat mula kay NBI Director Judge Jaime Santiago, ang kaso ay nag-ugat sa isang case referral ng Destiny Rescue Philippines, Inc. (DESTINY) na may dalawang babae ang nagbubugaw ng mga kabataan sa naturang bayan.
Napag-alaman na nag-aalok ang dalawang suspek ng mga menor de edad para sa serbisyong seksuwal sa halagang mula P3,000 hanggang P5,000.
Nagsagawa ng surveillance ang mga ahente ng NBI-OTCD, kasama ang mga tauhan mula sa DESTINY at nakipagkilala sa mga suspek hanggang magkaroon ng pag-uusap na magdadala sila ng dalawang kabataang babae sa halagang P3,000 para sa serbisyong seksuwal sa bawat isa.
Upang makompleto ang operasyon, humiling ang undercover team na ipagpaliban ang usapan at sa halip, binanggit nila na magkakaroon sila ng party sa isang private resort kung saan nag-alok ang dalawang suspek na magdadala sila ng mas maraming babae.
Dito na inilatag ng NBI-OTCD at DESTINY ang entrapment operation at nakipagtipan ang dalawang suspek sa undercover team sa napagkasunduang lokasyon sa Seven Villa Resort, sa nabanggit na bayan.
Nagdala ang dalawang suspek ng 11 mga babae kung saan inulit nila ang kanilang transaksiyon sa poseur client na ang bawat babae ay nagkakahalaga ng P3,000 para sa serbisyong seksuwal.
Ibinigay ng poseur client ang marked money na nagkakahalagang P33,000 sa isa sa mga suspek saka sila inaresto para sa paggamit at pag-alok sa mga biktima sa mga layuning seksuwal at pagsasamantala na pinapalitan ng halaga ng pera.
Nasagip ang 11 biktima ng trafficking, apat dito ay mga menor de edad at lumabas sa imbestigasyon na magkapatid ang dalawang biktima, habang ang isa sa mga biktima ay anak ng isa sa mga suspek na nakatira sa parehong sambahayan.
Dinala ang mga nailigtas na biktima sa MSWDO habang ang mga suspek ay iniharap para sa mga inquest proceedings sa Office of the Provincial Prosecutor, sa lungsod ng Malolos, para sa kasong Qualified Trafficking in Persons sa ilalim ng Section 4 na may kaugnayan sa Section 6 ng RA 9208, o Anti Trafficking in Persons Act of 2002, na sinususugan ng RA 10364 o Expanded Anti-Trafficking Act of 2002, at Sec. 6 ng RA 10175 Cybercrime Prevention Act of 2012. (MICKA BAUTISTA)
