HATAW! D'yaryo ng Bayan hatawtabloid.com
NADAKIP ang dalawang lalaking magkaangkas sa motorsiklo matapos mahulihan ng hindi lisensiyadong baril at patalim habang lumabag sa mga batas trapiko sa isinagawang Oplan Sita ng Malolos CPS sa McArthur Highway, Brgy. Bulihan, sa lungsod ng Malolos, lalawigan ng Bulacan, nitong Lunes ng madaling araw, 2 Hunyo.
Sa ulat na ipinadala kay P/Col. Franklin Estoro, officer-in-charge ng Bulacan PPO, kinilala ang mga suspek na sina alyas Van at alyas Chie.
Sa imbestigasyon, habang nagsasagawa ng Oplan Sita ang mga tauhan ng Malolos CPS, kanilang pinahinto ang isang Rusi motorcycle na walang plaka dahil sa reckless driving.
Ngunit imbes huminto, pinaharurot ng dalawang suspek ang kanilang dalang motorsiklo hanggang nagkaroon ng maikling habulan.
Matapos mapatigil ang sasakyan, maayos na nagpakilala ang mga awtoridad at hiningi ang lisensiya ng driver bilang bahagi ng standard procedure.
Dito napansin ng mga pulis ang isang .38 caliber revolver na nakasukbit sa baywang ni alyas Van kaya agad siyang inaresto.
Nakuha sa kaniya ang baril na may serial number 1293923 at may lamang tatlong bala samantala nakompiska mula kay alyas Chie ang dalawang patalim na nakatago sa kaniyang katawan.
Kasalukuyang inaalam ng mga awtoridad kung ang mga naarestong suspek ay kabilang sa mga riding-in-tandem na bumibiktima sa mga motorcycle riders sa Bulacan.
Nahaharap ang mga suspek sa paglabag sa RA 10591 (Comprehensive Firearms and Ammunition Regulation Act) at paglabag sa Batasang Pambansa Bilang 881 (Omnibus Election Code) dahil sa umiiral na gun ban, Batasang Pambansa Bilang 6 (pagdadala ng patalim), at RA 4136 (pagmamaneho nang walang lisensya, walang OR/CR, at reckless driving). (MICKA BAUTISTA)
