HATAW! D'yaryo ng Bayan hatawtabloid.com
SA ANUNSIYO ng Quezon City Police District (QCPD) na kanilang iimbestigahan ang sinasabing pagkawala ng Vivamax star, agad nagpaskil sa kaniyang social media account ang aktres na si Karen Lopez upang linawin ang isyu.
Sa kaniyang paskil sa Facebook, humihingi ng paumanhin ang aktres sa pagiging ‘off the grid’ umano niya nitong mga nakaraang araw.
“Pasensiya na talaga kung bigla akong nawala nitong mga nakaraang araw. Kailangan ko lang munang magpahinga at mag-focus sa sarili ko. Dumaan ako sa mga bagay na medyo mabigat mentally and emotionally, at napagtanto kong kailangan kong unahin ang well-being ko- even if that meant stepping back for a while,” base sa kaniyang post.
“Alam kong may ilan sa inyo ang nag-aalala o nagtaka at sobrang na-appreciate ang message at support ninyo. Slowly, I getting better and trying to comeback stronger, one step at a time….Thank you sa patience, sa pagmamalasakit at sa pag-unawa. Malaking bagay kayo sa recovery ko,” dagdag ng aktres.
Una rito, naglabas ng pahayag ang QCPD na hinihikayat ang may direktang kaalaman o koneksiyon sa nasabing aktres na makipag-ugnayan sa kanilang tanggapan.
Magsasagawa umano ng imbestigasyon ang QCPD Kamuning Police Station 10, kabilang ang panayam sa personal assistant ng aktres, pati na rin ang pagsusuri sa mga CCTV footage mula sa lugar kung saan siya huling nakita.
Samantala, umani ng samot-saring batikos sa netizens ang aktres sa ginawa niyang pagtatago at biglang paglutang. (ALMAR DANGUILAN)
