HATAW! D'yaryo ng Bayan hatawtabloid.com
PINAIGTING ng Criminal Investigation and Detection Group (CIDG) ang operasyon laban sa cybercrime sa buong bansa na nagresulta sa pagkaaresto sa dalawang Chinese nationals sa lungsod ng Baliuag, lalawigan ng Bulacan, nitong Miyerkoles, 7 Mayo.
Nagsagawa ng entrapment operation ang CIDG Bulacan Provincial Field Unit at ang Presidential Anti-Organized Crime Commission (PAOCC) kasama ang Baliuag MPS at Tagaytay CPS sa Primavera Homes, Brgy. Sabang, Baliuag, na nagresulta sa pagkakaaresto sa Chinese nationals na kinilalang sina Feng at Shi.
Nahuli sa akto ang dalawang dayuhan sa pagmamay-ari, pag-install at pag-deploy ng mga electronic equipment na may kakayahang humarang, mag-imbak, at gumamit ng impormasyong nakuha mula sa iba’t ibang kagamitan sa komunikasyon partikular ang mga cellphone.
Sa operasyon, nakuha ng mga awtoridad mula sa mga suspek ang mga elektronikong kagamitan kabilang ang metal box na baterya na may positibo at negatibong terminal na may mga wire; IMEI Catcher kompletong pagpupulong (Mother board); antenna ng IMEI Catcher; Huawei Wifi Internet Router; 3000W inverter kompletong pagpupulong; at 1200 portable inverter color silver.
Nakompiska rin ang sasakyang Toyota Fortuner na ginamit ng dalawang Chinese na pansamantalang nakakulong sa CIDG Bulacan Provincial Field Unit.
Sasampahan ng kaso sa National Prosecution Office ng paglabag sa Section 4, para sa (5) (Misuse of Devices) sub-paragraph (i) ng Republic Act No. 10175 (Cybercrime Prevention Act of 2012) ang dalawa.
Ayon kay CIDG Director P/Maj. Gen. Nicolas Dela Torre III, sa pagkaaresto sa mga suspek at pagkakakompiska ng mga naturang device ay napigilan ang cybercrime at posibleng pagharang, pag-iimbak, at paggamit ng impormasyong nakuha mula sa iba’t ibang kagamitan sa komunikasyon partikular ang mga cellphone.
Aniya, delikado ang ginagawa ng mga suspek na pag-intercept at pag-store ng information mula sa communication devices, na paglabag sa individual human rights at banta sa national security. (MICKA BAUTISTA)
