Sa Norzagaray, Bulacan
PUGANTE NASUKOL SA PINAGTATAGUAN DERETSO KALABOSO

NAGWAKAS ang matagal na panahong pagtatago nang tuluyang mahulog sa kamay ng batas ang isang lalaking may kinakaharap na sapin-saping mga kaso sa lalawigan ng Bulacan.

Sa ulat mula kay P/Col. Franklin Estoro, Provincial Director ng Bulacan PPO, kinilala ang suspek na si alyas Cardo, 51 anyos, isang welder, kabilang sa No. 10 most wanted persons – provincial level.

Matagumpay na nadakip ang suspek ng mga operatiba ng Norzagaray MPS sa isinagawang joint operation kasama ang Provincial Intelligence Team (PIT) Bulacan-East dakong 5:10 ng hapon nitong Lunes, 5 Mayo, sa Brgy. FVR, bayan ng Norzagaray.

Ikinasa ang operasyon batay sa intelligence packet na ibinigay ng PIT Bulacan-East at ipinatupad ng Tracker Team ng Norzagaray MPS.

Naaresto ang akusado sa bisa ng warrant of arrest sa paglabag sa Section 28 (a) ng RA 10591 o ang Comprehensive Law on Firearms and Ammunition, na sumasaklaw sa mga probisyon ng RA 9516, RA 8294, at PD 1866.

Ang nasabing warrant of arrest ay inisyu at nilagdaan ni Presiding Judge Reuben Ritzuko Veradio, ng Malolos City RTC Branch 104.

Kasalukuyang nasa kustodiya ng Norzagaray MPS ang akusado para sa naangkop na disposisyon at dokumentasyon. (MICKA BAUTISTA)