HATAW! D'yaryo ng Bayan hatawtabloid.com
ni Micka Bautista
BILANG bahagi ng mas pinaigting na pagpapatupad ng gun ban ng Commission on Elections (Comelec) para sa nalalapit na halalan, matagumpay na nakompiska ng Police Regional Office 3 (PRO3) ang kabuuang bilang na 360 baril at pampasabog; at naaresto ang 356 indibiduwal mula 12 Enero hanggang 4 Mayo 2025.
Kabilang sa mga naaresto ang apat na miyembro ng Armed Forces of the Philippines (AFP), pitong security guards, pulis, isang halal na opisyal ng pamahalaan, at mga sibilyan.
Ayon kay PBGeneral Jean S. Fajardo, regional director ng PRO3, ang operasyon na ito ay patunay ng seryosong hakbang ng pulisya ng Gitnang Luzon upang sugpuin ang mga banta sa seguridad kasabay ng halalan at hindi sila magdadalawang-isip na arestohin ang mga lalabag sa batas, anuman ang kanilang katayuan sa lipunan.
Bilang bahagi ng mas pinalakas na kampanya laban sa loose firearms, 1,300 indibiduwal ang nagboluntaryong nagdeposito ng kanilang mga armas at 273 ang nagsuko ng kanilang hindi lisensiyadong baril.
Dagdag ni PBGeneral Fajardo, “ang kampanyang ito ay hindi lamang para sa gun ban kundi para sa pangmatagalang kapayapaan sa rehiyon at ang kooperasyon ng bawat mamamayan ay susi sa pagpapababa ng bilang ng loose firearms na nagiging sanhi ng karahasan.”
Tiniyak ng PRO3 na ipagpapatuloy ang mahigpit na checkpoint at mga intelligence-driven law enforcement operations hanggang matapos ang election period, upang matiyak ang isang mapayapa, ligtas, at tapat na halalan sa buong rehiyon.
