Sa Zambales road rage
Motorcycle vlogger inisyuhan ng LTO-SCO

INISYUHAN ng Land Transportation Office (LTO) ng ‘Show Cause Order” (SCO) ang isang sikat na motorcycle vlogger dahil sa insidente ng road rage sa Zambales, na nag-viral sa social media.

Sinabi ni LTO Chief, Assistant Secretary Atty. Vigor D. Mendoza II, kanilang hihilingin sa Yanna Moto Vlog na ipaliwanag kung bakit hindi dapat suspendehin o bawiin ang kanyang lisensiya sa pagmamaneho dahil sa nangyaring road rage na kanyang kinasangkutan.

“Matagal na tayong nagpapaliwanag sa milyon-milyon nating mga kababayang motorista na walang mabuting idinudulot ang init ng ulo sa kalsada — at napakarami ang naparusahan natin dito,” ayon kay Mendoza.

“On the part of this vlogger, she should have used her social media influence to promote responsible driving and road safety,” dagdag niya.

Sa viral video, ipinakita ni Yanna Vlog ang middle finger gesture sa driver ng isang pick-up truck dahil wala umanong ingat ang pagmamaneho ng huli.

Dahil dito, kinompronta siya ng pick-up driver kung bakit siya nag-bad finger gayong maayos umano ang kaniyang pagmamaneho kalsada.

Nakipagtalo si Yanna Vlog sa pick-up driver at gumawa ng mga nakaiinsultong komento nang umalis ang huli.

Humingi ng paumanhin si Yanna Vlog matapos ma-bash sa social media.

Gayonman, sinabi ng LTO chief na itutuloy pa rin ang imbestigasyon sa insidente. (ALMAR DANGUILAN)