HATAW! D'yaryo ng Bayan hatawtabloid.com
SINALAKAY ng mga tauhan ng National Bureau of Investigation (NBI) -Tarlac District Office ang isang bodegang nag-iimbak ng mga pasóng grocery items at pinapalitan ang expiration date upang magmukhang bago at maibenta sa mga sari-sari store sa Capas, lalawigan ng Tarlac.
Ayon kay NBI head agent Johnny Logrono, isang impormante ang nagsumbong sa kanila tungkol sa ilegal na gawain sa bodega.
Dagdag ni Logrono, ipinagbigay-alam sa kanila ng impormante na ang ilang mga grocery items partikular ang mga produkto tulad ng gatas, noodles at tsokolate ay mga pasóna at nilagyan ng mga bagong label saka ibinebenta para sa pampublikong konsumo.
Sa bisa ng search warrant, tumambad sa mga operatiba ang kahon-kahong expired na produkto kabilang ang mga gatas, noodles, mayonnaise, at tsokolate.
Nakita na ang ilan sa mga produkto ay taong 2023 pa na-expire at ibinabagsak sa iba’t ibang pamilihan sa mas murang halaga.
Dagdag ni Logrono, mismong sa loob ng bodega naglalagay ng bagong label at binubura muna ang mga expiry date.
Ang nakatatakot aniya dito, ang mga mamimili sa mga sari-sari store ay hindi na tumitingin sa mga expiry date dahil mura ngunit hindi nila alam na ang nakakain nila ay expired na mga produkto at maaaring maging sanhi pa ng food poisoning o diarrhea.
Tinatayang aabot sa P5 milyong halaga ng mga expired items ang nasamsam na pawang hindi na ligtas kainin.
Nabatid na wala ang may-ari ng bodega nang gawin ang pagsalakay ngunit sasampahan ng mga kasong paglabag sa Consumer Act at Food and Drug Administration Act.
Paalala ng NBI sa mga bumibili ng mga produkto ng mga special milk products at iba pang grocery items, pakasiguradohin kung ito ay mga bago dahil kung expired na ay delikado sa kaluusgan at kaligtasan ng consumers. (MICKA BAUTISTA)
