Absentee voting ng AFP matagumpay na naisagawa sa Fort Ramon Magsaysay

MATAGUMPAY na naisagawa ang Absentee Voting para sa mga sundalo ng iba’t ibang Philippine Army Major Units at SOCOM – AFP sa Fort Ramon Magsaysay, sa Palayan, lalawigan ng Nueva Ecija, nitong Martes, 29 Abril, bilang bahagi ng karapatan at kalayaan ng mga sundalo na mamili at bumoto ng kanilang napiling mga kandidato sa national level, at ito rin ay bilang preparasyon at paghahanda para sa seguridad ng nalalapit na National and Local Elections sa 12 Mayo.

Pinangasiwaan ang botohan sa Kaugnay Officers’ Clubhouse ng 7th Infantry (Kaugnay) Division, sa pangunguna ng Commission on Elections (COMELEC), katuwang ang pamunuan ng 7ID.

Layunin ng aktibidad na mabigyan ng pagkakataong bumoto ang mga sundalong posibleng ma-deploy o nasa critical na tungkulin sa araw ng halalan.

Lumahok ang mga botante mula sa iba’t ibang Military units sa Fort Magsaysay, kabilang ang 7ID; Special Operations Command (SOCOM), AFP; Special Forces Regiment (Airborne); 1st Brigade Combat Team (1BCT); Army Aviation Regiment (AVnR); Armor “Pambato” Division (AAR); Combat Engineering Regiment (CER); Army Artillery Regiment; Installation Management Command (IMCOM), at Light Reaction Regiment (LRR).

Naging sistematiko, payapa, at ligtas ang buong proseso ng pagboto, kasabay ng mahigpit na pagpapatupad ng security protocols.

Ang One FortMag Community Absentee Voting ay patunay ng pagtupad ng mga kawal sa kanilang tungkulin hindi lamang bilang tagapagtanggol ng bayan kundi bilang aktibong mamamayan sa ilalim ng isang demokratikong lipunan. (MICKA BAUTISTA)