3 notoryus na pugante naihoyo

TULUYANG nasakote ang tatlong notoryus na puganteng may pinagtataguang kaso sa hukuman sa inilatag na manhunt operations ng pulisya sa lalawigan ng Bulacan nitong Linggo, 27 Abril.

Kinilala ang isa sa mga pugante ng mga operatiba ng Malolos CPS na isang alyas Ivie, natutop sa Brgy. Guinhawa, sa lungsod ng Malolos, dakong 4:00 ng hapon kamakalawa.

Dinakip ang suspek sa bisa ng warrant of arrest para sa kasong paglabag sa RA 10883 (New Anti-Carnapping Act of 2016) na inilabas ni Presiding Judge Sarah Castro Marcos Martin ng Urdaneta City, Pangasinan RTC Branch 45.

Samantala, sa hiwalay na manhunt operation na isinagawa ng tracker team ng Plaridel MPS at Meycauayan CPS, nadakip ang dalawa pang puganteng kinilalang sina alyas Moses, na inaresto sa kasong paglabag sa Sections 5 at 11, Article II ng RA 9165 dakong 9:00 ng umaga sa Brgy. Culianin, Plaridel; at si alyas Mich, na inaresto para sa kasong Robbery dakong 10:15 ng umaga sa Brgy. Camalig, Meycauayan.

Kasalukuyang nasa kustodiya ng kani-kanilang arresting units/stations ang mga naarestong indibiduwal para sa tamang disposisyon.

Ang sunod-sunod na matagumpay na operasyon ng Bulacan Police Provincial Office sa ilalim ng pamumuno ni P/Col. Franklin Estoro ay nagpapakita ng kanilang hindi matitinag na dedikasyon sa paglaban sa kriminalidad. (MICKA BAUTISTA)