Naipit sa trapiko
Driver tiklo sa panunutok ng baril

DINAKIP ng pulisya ang isang lalaking driver matapos ireklamo ng panunutok ng baril laban sa isang driver nang magkagitgitan sa trapiko sa  bayan ng Guiguinto, lalawigan ng Bulacan.

Sa ulat na ipinadala kay P/Col. Franklin Estoro, officer-in-charge ng Bulacan PPO, lumabas sa imbestigasyon na minamaneho ng biktima ang isang garbage truck sa kahabaan ng C. Mercado St., sa nabanggit na bayan, nang siya ay pansamantalang natigil sa intersection dahil sa matinding trapik.

Samantala, ang suspek na sakay ng isang Toyota Hilux, ay nagtangkang dumaan ngunit napigilan ng pagsisikip sa trapik.

Sa hindi malamang dahilan, sinasabing ginawa ng suspek ang malaswang pagkumpas ng kamay sa biktima at iniumang ang isang Taurus G2C 9mm pistol na may serial number ADD255972, kargado ng walong bala.

Agad humingi ng tulong ang biktima sa pulisya na nagsasagawa ng visibility patrol sa lugar na naging dahilan ng agarang pagkakaaresto sa suspek.

Inihahanda na ang mga kasong Grave Threat, Usurpation of Authority, at paglabag sa RA 10591 (Comprehensive Firearms and Ammunition Regulation Act) kaugnay ng Omnibus Election Code, na isasampa laban sa suspek na nasa kustodiya na ng Guiguinto MPS. (MICKA BAUTISTA)