HATAW! D'yaryo ng Bayan hatawtabloid.com
PATAY ang dalawang estudyanteng kagagraduate lang nang pagbabarilin sa loob ng isang milktea shop sa lungsod ng San Jose del Monte, lalawigan ng Bulacan, nitong Lunes, 21 Abril.
Ayon sa ulat mula sa San Jose del Monte CPS, naganap ang insidente ng pamamaril sa dining area ng Big Brew Milktea Shop sa Brgy. Paradise 3, sa naturang lungsod.
Nabatid na dakong 1:00 ng hapon, kasalukuyang nagmemeryenda sa loob ng nabanggit na milktea shop ang mga biktimang sina Rey, 20 anyos; at Jeric, 20 anyos, nang walang kaabog-abog na dumating ang suspek na kinilalang si alyas Randy.
Bago nakakilos, bigla na lamang pinaputukan ni alyas Randy ang dalawang biktima, isa sa kanila ay dead on the spot, habang ang isa naman ay binawian ng buhay sa Skyline Hospital.
Matapos isagawa ang krimen, mabilis na tumakas si alyas Randy na sentro ngayon ng pagtugis ng mga tauhan ng San Jose del Monte CPS.
Patuloy na inaalam ng mga awtoridad ang motibo ng suspek sa isinagawang pagpatay sa mga biktima na kagagraduate lamang kaya nagkayayaan na magmeryenda sa milktea shop. (MICKA BAUTISTA)
