HATAW! D'yaryo ng Bayan hatawtabloid.com
NASAKOTE ang isang babaeng matagal nang wanted sa pagiging illegal recruiter sa labas ng isang simbahan sa bayan ng Balagtas, sa lalawigan ng Bulacan.
Ayon kay P/Maj. Mark Vincent Centinaje, hepe ng Balagtas MPS, nagre-recruit ang suspek na kinilalang si alyas Neldy ng mga babae para gawing restaurant server sa Malaysia pero sa prostitusyon ang bagsak.
Napag-alamang nahihimok ng suspek ang mga biktima dahil sa salita na wala silang babayaran sa processing ng mga papeles at pagbanggit na wala silang gagawin kundi maging server o mga waitress sa mga restaurant at mga bar sa Malaysia.
Ngunit imbes maging waitress at dahil walang working visa ang mga biktima, ang bagsak nila ay ginagawa silang prostitutes.
Ayon pa kay P/Maj. Centinaje, mula sa Bulacan ay dadalhin ng suspek ang mga biktima sa Ninoy Aquino International Airport (NAIA) upang ibiyahe sa Palawan.
Mula sa airport ng Palawan, susunduin ang mga biktima ng van patungong Brooke’s Point upang ibiyahe sakay ng speedboat sa Balabac, Palawan.
Mula naman dito, ililipat muli sila sa isa pang speedboat upang dalhin sa Kudat, Malaysia.
Sa naging reklamo ng mga biktima, inaalok sila ng suspek ng trabaho sa abroad na P50,000 hanggang P60,000 sahod kada buwan.
Dagdag ni P/Maj. Centinaje, hinuhuli ang mga biktima sa mga pinagtratrabahuang bar dahil walang kaukulang papeles na maipakita sa mga awtoridad.
Payo ng PNP, maging vigilant sa nakakausap na mga tao na nag-aalok ng trabaho sa abroad.
Samantala, katuwiran ng suspek na nakakulong ngayon sa Balagtas MPS custodial facilty, nadamay lang siya sa ibinibintang sa kanya.
Nakatakdang sampahan ng kasong human trafficking at large-scale illegal recruitment ang suspek sa hukuman. (MICKA BAUTISTA)
