HATAW! D'yaryo ng Bayan hatawtabloid.com
BAGO nakatakas, nagawang arestohin ng mga awtoridad ang isang lalaki na pumatay sa kaniyang kaalitan sa bayan ng Norzagaray, lalawigan ng Bulacan, nitong Linggo, 20 Abril.
Ayon sa ulat na ipinadala kay P/Col. Franklin Estoro, officer-in-charge ng Bulacan PPO, nadakip ng mga nagrespondeng tauhan ng Norzagaray MPS ang suspek sa pamamaslang na kinilalang si alyas Gary dakong 7:00 ng gabi sa Brgy. Poblacion, sa nabanggit na bayan.
Lumalabas sa imbestigasyon na naglalakad ang biktima at bibili ng pagkain sa palengke nang biglang sumalakay ang suspek na matagal na palang nag-aabang sa kalsada saka paulit-ulit na pinagsasaksak ang biktima gamit ang kutsilyo.
Agad namatay ang biktima sa rami ng tama ng saksak sa kaniyang katawan.
Samantala, matapos isagawa ang krimen ay nagtangkang tumakas ang suspek ngunit nagawang arestohin ng mga nagpapatrolyang pulis ng Norzagaray MPS.
Nabatid na dati nang may alitan ang dalawa na hindi nagawang ayusin kaya nagawang patayin ng suspek ang biktima. (MICKA BAUTISTA)
