HATAW! D'yaryo ng Bayan hatawtabloid.com
ARESTADO ang isang lalaki na nang-hostage sa isang 2-anyos batang babae sa loob ng isang oras sa Bulungan Market, sa Brgy. La Huerta, sa lungsod ng Parañaque, nitong Linggo ng hapon, 13 Abril.
Kinilala ni P/Lt. Madison Perie ng Parañaque CPS ang suspek na si alyas Andy, tubong Samar.
Ayon kay Perie, nakitang pagala-gala sa palengke ang suspek dala ang patalim ilang minuto bago kunin ang batang naglalaro sa isang kalye malapit sa Bulungan Market.
Agad tumawag ng tulong mula sa pulisya ang mga taong nakakita sa insidente.
Samantala, nasugatan ang nagrespondeng pulis na si Pat. Samuel Melad sa kaniyang kanang kamay nang tangkaing agawin ang kutsilyo mula sa suspek.
Nagawang masagip ng mga awtoridad ang batang biktima na sa kabutihang palad ay hindi nasugatan.
Hindi inilabas ng pulisya ang dahilan ng suspek sa pangho-hostage sa batang biktima.
Kasalukuyang nakapiit ang suspek sa Parañaque CPS custodial facility at sinampahan ng kasong serious illegal detention, child abuse, grave threat, alarm and scandal, at illegal possession of a bladed weapon.
