HATAW! D'yaryo ng Bayan hatawtabloid.com
HARD TALK
ni Pilar Mateo
BAKIT ba ang ingat ni Jojo Mendrez?
Teka. Sino siya?
Dahil sa taglay niyang talento sa pag-awit, kinilala siya sa pagsisikap na makapagbahagi ng sariling estilo bilang “Revival King.”
Niyakap ng mga mahilig sa musika ang bersiyon niya ng mga kanta ng APO at ni Florante.
Pero dumating ang pandemya kaya nakudlitan ang umusbong na niyang karera sa pagkanta.
Na naging dahilan naman para mapaghandaan na niya ang kasunod na plano ng muling paglantad sa mundo ng musika.
Eto na nga. Paborito niya ang piyesa na pinasikat ng yumaong Julie Vega noong dekada 80. Ang Somewhere in My Past.
In some ways, relate rin daw siya sa kanta.
Dahil kung may babalikan nga naman siya in his past, ‘yun ang mga bagay na dinaanan niya para makarating kung nasaan siya ngayon.
Kaya tuwang-tuwa si Jojo nang sa unang salang pa lang ng nasabing revival, million views na ang tinamo nito.
Kaya natuwa siya nang lumagda na ng kontrata sa Star Music sa paggiya ni Jonathan Manalo. Na may piyesa ring ginawa para sa kanya.
Nasaksihan din namin ang napaka-gandang pagtanggap kay Jojo ng kanyang mga tagasubaybay, nang samahan siya ng mga ito sa pagdalo niya sa birthday show ni Romel Chika sa Clownz Republic.
Dagundong ang comedy bar sa hiyawan at palakpakan ng supporters ng Revival King.
At sa mga ganoong pagkakataon, naipapamalas din ni Jojo ang pagiging generous at bukas-palad.
Biglaan siyang nagpapa-game na cash ang katumbas. Walang kaabog-abog!
Kaya hindi naman ito nababahala kung sa kalagitnaan ng kanyang pamamayagpag ngayon ay may mga panggulo on the side.
Iniiwasan na nga niya na lumaki ang mga isyu o usap-usapan, pero the situation presents itself.
Mantakin mo namang sa presscon niya, lumitaw ang nauugnay sa kanyang aktor na may dalang mga bulaklak.
Deadma na lang si Jojo. Kasi nga naman mag-deny siya o hindi, paniniwalaan ng tao ang gusto nila.
Basta ang mahalaga, nagsimula na siyang mamayagpag.
Ang aabangan nga raw sa kanyang ilalabas na video eh, ang partisipasyon ng National Artist at Superstar na si Nora Aunor.
Kaya alam na this. Alam na natin kung sino siya.
