Tomahawk plane nag-emergency landing sa Bulacan

ni Micka Bautista

INIULAT ng pulisya ang emergency landing incident ng isang PA 38 Tomahawk plane matapos magkaroon ng engine failure habang lumilipad sa bahagi ng Plaridel, Bulacan kahapon ng umaga.

Nakaligtas sa insidente ang mga sakay ng eroplano na kinilalang sina Velentine Bartolome y Torre III, pilot instructor, 50 anyos, residente sa BF Homes Almanza Dos, Las Piñas City; at David John Cayaban y Cabrera, 25 anyos, training pilot, residente sa 23 Mil Flores Drive, Beverly Hills, Antipolo City.

Ayon sa piloto, nag-take off sila bandang 9:15 ng umaga sa Flight Line (flying school) sa Brgy. Lumang, Bayan, Plaridel.

Habang nasa kalagitnaan ng flight training ay napag-alaman ng pilot instructor na biglang huminto ang makina ng nasabing eroplano dahil umano sa engine failure.

Ito ang nagbigay-daan sa kanya na gamitin ang grass field sa Brgy. Lalangan bilang emergency landing kaya ang dalawang biktima ay ligtas at walang palatandaan ng pinsala.

Sa kasalukuyan, ang mga tauhan ng CAAP Security Intelligence Service ay nasa lugar para magsagawa ng imbestigasyon. (MICKA BAUTISTA)