HATAW! D'yaryo ng Bayan hatawtabloid.com
NASAKOTE ng mga operatiba ng PRO3 ang isang lalaking nakatalang high-profile na pugante sa manhunt operation na inilatag sa bayan ng Balagtas, lalawigan ng Bulacan.
Dinakip ng pinagsanib na puwersa ng 3rd Platoon, 1st Provincial Mobile Force Company (PMFC) ng Bulacan PPO, sa koordinasyon ng Bulacan West PIT-RIU3, Balagtas MPS, Bocaue MPS, at 305th at 301st Maneuver Companies ng RMFB3 ang puganteng kinilalang si Carlos Angel Macabato, alyas Dagul, 21 anyos, sa Brgy. Borol 1st, sa nabanggit na bayan.
Nakatala si Macabato, residente sa Brgy. Caingin, Bocaue, bilang No. 6 most wanted sa regional level, No. 4 sa provincial level, at No. 1 sa municipal level ng bayan ng Bocaue.
Inaresto ang suspek sa bisa ng warrant na inilabas ni Presiding Judge Olivia Escubio-Samar, ng Malolos City RTC Branch 79 para sa kasong Statutory Rape na walang inirekomendang piyansa.
Kasunod ng pag-aresto, ipinaalam sa kaniya ang mga karapatan sa konstitusyon at ngayon ay nasa kustodiya ng Bulacan 1st PMFC para sa angkop na dokumentasyon at legal na paglilitis. (MICKA BAUTISTA)
