HATAW! D'yaryo ng Bayan hatawtabloid.com
SIPAT
ni Mat Vicencio
TAONGBAYAN ang maghahalal sa bawat kandidatong tumatakbo ngayong darating na eleksiyon na nakatakda sa Mayo 12. At kung lokal na halalan ang pag-uusapan, malaking bagay sa tagumpay ng bawat kandidato ang suporta ng mga barangay chairman at mga kagawad sa kani-kanilang distrito.
Tulad sa Lungsod ng Maynila, masasabing matindi ang labanan sa pagitan nina Mayor Honey Lacuna at dating Mayor Isko “Yorme” Moreno, na ngayon ay parehong matindi ang ginagawang ‘panliligaw’ hindi lang sa mga botante kundi maging sa mga kagawad at kapitan ng bawat barangay.
At isa nga si dating Chairman Nelson Ty ng Binondo sa sumusuporta kay Isko. Malinaw ang dahilan ni Nelson kung bakit si Yorme ang kanyang dadalhin sa darating na halalan… May political will!
Paliwanag ni Nelson, “mahigpit si Yorme bilang isang mayor lalo na kung ang ipatutupad nito ay tama at naaayon sa batas. Kapakanan at interes ng Manilenyo ang inuuna ni Yorme.”
Bilang isang lingkod bayan na nakabase sa Binondo, hindi makakalimutan ni Nelson ang ipinangako ni Yorme na mas pauunlarin pa ang negosyo sa Binondo at palalakasin ang turismo kabilang na ang mahigpit na pagpapatupad ng peace and order.
Sabi pa ni Nelson, “ang disiplinang ipinatupad ni Yorme sa Maynila ay hindi matatawaran lalo na sa pagsasaayos ng mga kalsada at bangketa, at paglilinis ng mga kapaligiran sa bawat komunidad.”
Si Nelson din ang saksi, bilang isang dating chairman kung paano tinugunan ni Yorme ang paglaban sa Covid-19 pandemic na higit na apektado ang mahihirap at kapos na Manilenyo.
At ang housing distribution at healthcare improvements na pangunahing programa ni Yorme ang pinakaaabangan ngayon ng mga Manilenyo sa nalalapit niyang pagbabalik bilang Ama ng Maynila sa Mayo, at kabilang si Nelson sa umaasang ito ay maisasakatuparan.
Nakatitiyak si Nelson na magtatagumpay si Yorme sa darating na eleksiyon, at tuluyang maisasakatuparan ang adhikaing ninanais ng lahat ng Manilenyo… Let’s make Manila great again! (30)
