HATAW! D'yaryo ng Bayan hatawtabloid.com
NAHARANG ng pulisya na nagmamando ng checkpoint ang isang rider na maghahatid ng marijuana sa bayan ng Sta. Maria, lalawigan ng Bulacan, nitong Linggo, 26 Enero.
Sa ulat ni P/Lt. Col. Voltaire Rivera, hepe ng Sta. Maria MPS, habang nagsasagawa ang kaniyang mga tauhan ng COMELEC Checkpoint ay pinara nila ang suspek na kinilalang si alyas John dahil sa paglabag sa batas trapiko.
Habang kinukuha ng suspek ang mga kinauukulang dokumento sa compartment ng motorsiklo nito ay tumambad sa mga operatiba ang sachet na naglalaman ng pinaniniwalaang marijuana.
Agad inaresto ang suspek at inimpormahan ng kaniyang paglabag sa RA 4136 at RA 9165 at sinabihan ng kanyang Miranda rights.
Napag-alamang ang dalang marijuana ng suspek ay ihahatid sa mga user sa ilang bayan sa Bulacan.
Kasalukuyang nasa kustodiya ng Sta. Maria MPS ang suspek na nahaharap sa kasong paglabag sa RA 9165 o Comprehensive Dangerous Drug Act of 2002, habang isinumite ang mga kompiskadong ebidensiya sa Crime Laboratory para sa forensic examination. (MICKA BAUTISTA)
