PBB Gen 11 Fyang Smith sa mga lalaking manloloko – Cheating is a choice, not a mistake

MA at PA
ni Rommel Placente

INAMIN ng itinanghal na Big Winner ng Pinoy Big Brother Gen 11 na si Fyang Smith na mukhang wala siyang suwerte pagdating sa pakikipagrelasyon. Ilang beses na siyang niloko ng mga nakarelasyon niya.

“Hindi ko po alam. Talagang lahat sila, talagang nag-cheat sa akin. I don’t know why. Siguro may hinahanap sila sa akin, na hindi talaga. Bakit niyo ba ako sinimulan?” sabi ni Fyang sa isang interview sa kanya.

“Ayon ‘yung hindi ko ma-gets sa ibang lalaki na bakit pa kayo pumapasok sa buhay ng isang babae kung hindi niyo kayang panindigan? Anong sense?” aniya pa.

Nagtataka pang tanong ni Fyang, “Pumasok lang ba kayo sa buhay ng isang babae para sirain ‘yung buhay niya? I don’t get why bakit kailangan pumasok sa buhay ng isang payapang buhay para mag-cheat?

“Cheating is a choice, not a mistake,” ang hirit pa ng magandang dalaga.

Pero hindi naman siya na-trauma sa love kahit na ilang beses nang nakaramas ng heartbreak. Umaasa pa rin siya na darating at darating din ang tamang lalaki para sa kanya.

“Hindi naman po ako nagmamadali. Career first po muna. Now po, ang fino-focus ko po talaga, pag-acting.” 

Sabi pa ni Fyang, lahat ng na-experience niya sa buhay ay ginamit niyang motivation para makatulong sa pamilya sa pamamagitan ng pagkakaroon at pagpu-push sa kanyang career bilang content creator.