HATAW! D'yaryo ng Bayan hatawtabloid.com
WALA nang buhay at may tama ng bala ng baril sa kaniyang ulo nang matagpuan ang isang miyembro ng Philippine Army (PA) sa kanilang headquarters sa bayan ng San Miguel, lalawigan ng Bulacan, nitong Huwebes, 9 Enero.
Sa ulat ni P/Lt. Col. Ronnie Albino, hepe ng San Miguel MPS, kinilala ang biktima na si Sgt. Henry Española, nakatalaga sa Philippine Army 6th Scout Ranger Company.
Lumalabas sa inisyal na imbestigasyon na dakong 2:35 pm noong Huwebes, natagpuang wala nang buhay ang biktima sa palikuran ng ikaapat na palapag ng retraining barracks ng Philippine Scout Ranger Company sa Brgy. Tartaro, sa nabanggit na bayan.
Nadiskubre ang bangkay ng biktima matapos magpunta sa banyo si Sgt. Junrey Binonggo upang hugasan ang kaniyang baunan at nagulat nang makitang nakausli ang dalawang paa ni Española mula sa ikaapat na cubicle ng banyo.
Napag-alamang ang biktima ay may tama ng bala sa ulo at natagpuan ang baril nitong Caliber 45 Rock Island malapit sa kanyang katawan.
Iniimbestigahan ng mga awtoriad ang motibo sa likod ng pamamaslang ngunit hindi ibinasura ang posibilidad ng pagpapakamatay ng biktima.
Agad na hiniling ng San Miguel MPS sa Bulacan Provincial Forensic Unit (BFU) na iproseso ang lugar na pinangyarihan ng krimen. (MICKA BAUTISTA)
