Binaril sa harap ng barangay hall, courier rider todas

PATAY ang isang lalaki nang mabaril ng kaniyang nakaalitan sa harap mismo ng isang barangay hall sa bayan ng Guiguinto, lalawigan ng Bulacan, nitong Miyerkoles, 16 Oktubre.

Sa ulat na ipinadala ng Guiguinto MPS kay P/Col. Satur Ediong, provincial director ng Bulacan PPO, kinilala ang biktimang si Rowell Dela Cruz, 42 anyos, driver ng J&T Express, residente sa Brgy. Malis, sa nabanggit na bayan.

Samantala, kasalukuyang tinutugis ng pulisya ang suspek na kinilalang si Jonathan Emello alyas Jojo.

Ayon sa inisyal na imbestigasyon, nakatanggap ang Guiguinto MPS ng tawag sa telepono mula sa barangay secretary ng Brgy. Tiaong tungkol sa insidente ng pamamaril.

Napag-alaman na dakong 8:15 am kamakalawa, nagpunta ang biktima sa naturang barangay hall upang magsampa ng reklamo laban kay Jojo Emelo hinggil sa kanilang hindi pagkakaunawaan.

Makaraan ito, lumabas na ang biktima sa barangay hall makalipas ng ilang minuto, nakarinig ng ilang putok ng baril ang sekretarya at nakita na lamang niya na nakahandusay sa lupa ang biktima.

Matapos ang pamamaril, tumakas ang suspek patungo sa direksiyon ng Bypass Road gamit ang isang tricycle bilang getaway vehicle.

Mabilis na nagresponde ang mga tauhan ng Guiguinto MPS sa pinangyarihan ng krimen upang magsagawa ng imbestigasyon at operasyon.

Kasunod nito, hiniling sa SOCO na iproseso ang pinangyarihan ng krimen. (MICKA BAUTISTA)