HATAW! D'yaryo ng Bayan hatawtabloid.com
PINURI at kinilala ni PNP Chief P/Gen. Rommel Francisco Marbil ang Police Regional Office 3 (PRO3) sa pamumuno ni P/BGen. Redrico Maranan, sa mabilis na pagresolba sa pamamaslang sa mag-asawang online seller sa Pampanga na sina Arvin at Lerma Lulu.
Ayon kay P/BGen. Maranan, ang pagkaaresto sa mga suspek, kabilang ang itinuturong utak, ay sumasalamin sa pangako ng PRO3 sa hustisya at kaligtasan ng publiko.
Itinampok ni P/Gen. Marbil ang mga pagsisikap ng PRO3, na binibigyang diin ang dedikasyon ng PNP sa pagprotekta sa publiko at pagtiyak na mananagot ang mga responsable sa marahas na krimen.
“Ang mabilis na pag-aresto sa mga suspek ay isang patunay ng aming walang humpay na paghahangad ng hustisya,” ani P/Gen. Marbil.
Kinilala ni P/BGen. Maranan ang dedikasyon ng kaniyang mga tauhan sa paglutas ng kaso, na muling pinagtitibay ang misyon ng PRO3 na mapanatili ang kapayapaan at seguridad sa Central Luzon.
“Hindi natin hahayaang makatakas sa hustisya ang mga gumagawa ng karumal-dumal na krimen,” pahayag ni P/BGen. Maranan. (MICKA BAUTISTA)
