P.5-M alok ni Bulacan Gov. Fernando vs suspects  
MURDER INIHAIN vs PULIS, 3 SIBILYAN SA PAGPASLANG SA BOKAL, DRIVER

KASUNOD ng pormal na paghahain ng dalawang bilang ng kasong Murder at dalawang bilang ng Frustrated Murder laban sa isang pulis at tatlong sibilyan, nag-alok si Bulacan governor Daniel Fernando ng pabuyang P.5 milyon para sa ikadarakip ng mga nagtatagong suspek.

               Inihain ng pamilya ng pinaslang na si Board Member at ABC President Ramilito Capistrano at kaniyang driver ang mga kaso laban sa apat na suspek sa City Prosecutors’ office, sa lungsod ng Malolos.

Makalipas ang 11 araw na imbestigasyon ng pulisya, natukoy ang pagkakakilanlan ng suspek na si P/SSgt. Ulysses Hernani Pascual, ng Brgy. San Roque, Navotas na dating nakatalaga sa Region 3 at ngayon ay nakatalaga sa Camp Crame.

Kasama sa sinampahan ng kaso sina Cesar Gallardo, Jr., isang alyas Lupin; at alyas Jeff na pawang mga nakalalaya pa rin sa kasalukuyan.

Natukoy ang mga suspek base sa ibinigay na impormasyon ng tatlong saksi sa naganap na ambush at sa tulong ng mga kuha ng CCTV.

Matatandaang napatay sa ambush si BM Capistrano, 56 anyos; at Shedrick Toribio, 23 anyos, habang nakaligtas sa pamamaril sina Rochelle Alburo, 18 anyos; Nelle Ann Ramos, 27 anyos.

Lumitaw sa imbestigasyon ng Scene of the Crime Office (SOCO), apat na baril ang ginamit sa pagpatay sa mga biktima — isang kalibre .38, kalibre .45, at dalawang 9MM pistol.

Kasabay nito, naglabas ng reward money si Gob. Daniel Fernando na nagkakahalagang P500,000 sa makapagtuturo sa kinaroroonan ng mga suspek sa karumaldumal na pamamaslang.

Patuloy na inaalam ng mga awtoridad kung ano ang motibo at kung sino ang nag-utos sa apat na suspek para patayin ang biktima. (MICKA BAUTISTA)