HATAW! D'yaryo ng Bayan hatawtabloid.com
INARESTO ng mga awtoridad ang dalawang indibiduwal at nasamsam ang ilang mga baril, bala at pampasabog sa isang buy-bust operation sa Lungsod ng San Fernando, Pampanga kamakalawa.
Kinilala ni PRO3 Director P/BGeneral Redrico A. Maranan ang mga suspek na naaresto ng magkasanib na mga operatiba ng Pampanga Provincial Intelligence Unit (PIU), 2nd Pampanga Mobile Force Company (PMFC), Regional Intelligence Unit 3 (RIU3), at San Fernando City Police Station na sina Ka Dutdut at alyas Eric, kapuwa residente sa Brgy. San Juan Baño, Arayat, Pampanga.
Nasamsam mula sa dalawa ang isang cal. 9mm na baril, kargado ng 7 rounds ng bala (subject of sale), isang hand grenade (subject of sale), dalawang load cal.38 revolver, dalawang hand grenade, P1,000 marked money, at P9,000 boodle money.
Ang mga naaangkop na kaso laban sa dalawang naaresto ay inihahanda para sa referral ng korte.
Pinuri ni PBGeneral Maranan ang sama-samang pagsisikap ng mga kasangkot na yunit at sinabing, “Ang operasyong ito ay isang patunay ng aming hindi natitinag na pangako na walisin sa mga komunidad ang mga ilegal na baril at pampasabog.” (MICKA BAUTISTA)
