3 patay sa sunog sa bulacan

TATLO ang namatay sa naganap na sunog sa isang residential house at isang e-bike store sa Bulakan, Bulacan kahapon ng madaling araw (Setyembre 16).

Sa ulat na ipinadala ni P/Lt. Col. Darwin Barbosa, hepe ng Bulakan Municipal Police station (MPS), kay Police Col. Satur Ediong, acting Bulacan police director, kinilala ang mga biktima na sina Rogelio Solis Jr., 46-anyos; ka-live-in na si Kristine de Dios, 52-anyos at ang anak nito na si Miyakiel Koreen de Dios, 8-anyos na mga residente ng Camino Street, Barangay San Jose, Bulakan, Bulacan.

Lumalabas sa inisyal na imbestigasyon na natupok ng apoy ang bahay ng mga biktima at ang puwesto ng Scooter City E-Bicycle Trading Store na pag-aari ng isang Darius Rodrigo dakong alas-3:00 ng madaling araw.

Tinitingnan pa ng mga imbestigador ang posibilidad na nagsimula ang sunog sa isang inabandunang electric bike na naka-charge. (MICKA BAUTISTA)