HATAW! D'yaryo ng Bayan hatawtabloid.com
ALAM MO NA!
ni Nonie Nicasio
ANG premyadong singer na si Mitoy Yonting kasama ang bandang The Drayber ang isa sa mga malalaking pangalang mapapanood sa “Idol” live concert tribute to April Boy Regino na gagawin sa Amoranto Stadium, sa Roces Avenue, Quezon City sa September 2, 2024, 7:00 pm.
Handog ito ng Water Plus Productions ni ex-Mayor Marynette Gamboa, bilang bahagi na rin ng kanilang shooting sa inaabangang bio-flick ng yumaong Idol ng Bayan na si April Boy.
Magiging bahagi rin ng nasabing concert sina Mae Rivera ng sikat na awiting “Array!”, Jackston Bros, comedienne Whitney Tyson at Tina Beso. Tampok din dito ang solong lalaking anak ni April Boy, na isang ganap na recording artist na – si JC Regino.
Hindi lang sa magandang show puwedeng mag-enjoy ang mga dadalo rito, kundi sa daan-daang papremyo rin ang kanilang suwerteng mapapanalunan gaya ng flat screen TV, electric fans, pack of rice, at maraming gift certificates from Sogo Hotel.
Sa nasabing concert, posible rin maging bahagi ng shooting ang mga manonood, kabilang ang mga bituing sina PJ Avellana, Irene Celebre, Hero Bautista, Kate Yalung, Dindo Arroyo, Aileen Papin, Jessica Pica, Tanya Gomez, at PCSO Director Imelda Papin.
Nandoon din ang biyuda ni April Boy na si Madelyn Regino. Ang pelikula ay sa direksiyon ni Efren Reyes, Jr., at associate director dito si Kaka Balagtas.
