HATAW! D'yaryo ng Bayan hatawtabloid.com
IBINUNYAG ni Manila Mayor Maria Sheilah “Honey” Lacuna-Pangan kasama ni Vice Mayor Yul Servo ang kasalukuyang kinakaharap ng kanyang liderato ang isyung utang ng Manila government na naiwan ng dating administrasyon.
Ang pagdetalye ni Lacuna ay kanyang ipinahayag sa buwanang Balitaan ng Manila City Hall Reporter’s Association (MACHRA) na ginanap sa Harbor View.
Nabatid na aabutin pa hanggang taong 2044 o dalawang dekada (20 taon) simula ngayong 2024 para tuluyang mabayaran ng pamahalaang lungsod ang P17.8 bilyong utang na iniwan ng dating administrasyon.
Ito ang ibinunyag na kasagutan ng alkalde nang siya’y hingan ng karagdagang pahayag ng media patungkol sa naturang utang at estado kung kailan inaasahang mababayaran ng Manila government.
Ayon kay Lacuna, sa naiwanang utang na P17.8 bilyones ng dating administrasyon ay nakapagbayad na ang city government ng P2.5 bilyon simula nang siya ay manungkulan bilang punong ehekutibo ng lungsod noong kalagitnaan ng 2022.
“‘Yung laki ng utang ng Maynila, ‘di naman kayang tustusan ng pondong meron lamang kami,” pahayag ng alkalde.
“Nahihirapan kami kasi ang kailangan ng mga tao ay social services. Naaapektohan naman ang kapasidad ng lungsod na tugunan ang mga pangangailangan ng lungsod at Manilenyo… there are more important needs that should be addressed immediately and that would benefit a larger portion of the population,” dagdag ni Mayor Lacuna.
Giit ni Lacuna, ang kanyang liderato ay nakatutok sa mga probisyon at proyekto sa social services kung saan mas marami ang direktang makikinabang na mga residente ng lungsod.
Kabilang sa mga pinaglalaanan ng serbisyo ay ang malaking bilang na aabot sa 203,000 senior citizens, persons with disability (PWDs) at solo parents na 50,000 ang kabuuang bilang.
Nasa 20,000 naman ang bilang ng mga student beneficiaries mula Grade 12, mga estudyante sa Universidad de Manila at Pamantasan ng Lungsod ng Maynila.
Ang mga nabanggit na sektor ay nakatatanggap ng monthly financial assistance mula sa lokal na pamahalaang lungsod na nais taasan ni Lacuna ang halaga ng ayuda kung hindi lamang nagbabayad ng obligasyon sa dalawang banko kung saan dating inutang ang P17.8 bilyon.
“Kung wala sana tayong obligasyong ganyang kalaki, mas marami sana tayong tulong na maibibigay sa mga Manileño, matataasan natin ang pambili ng gamot ng mga seniors man lang,” pagtatapos ni Lacuna.
Samantala, inisa-isa ni Lacuna ang mga naging proyekto ng dating administrasyon kung saan umabot sa P17.8 bilyones ang naiwanang utang.
Dahil sa kinakaharap na utang, nakatutok ngayon sa praktikal na mga proyekto ang kasalukuyang administrasyon lalo sa pagpapalakas aniya sa social services na kailangan ng mga residente sa lungsod.
Patuloy rin na inilalapit ng liderato ni Lacuna ang serbisyo para sa mga Manileño sa pamamagitan ng Kalinga sa Maynila. (BRIAN BILASANO)
