Dennis puring-puri si Alden — grabe ‘yung energy parang hindi napapagod

RATED R
ni Rommel Gonzales

HUMBLE si Dennis Trillo. Sa kabila ng katotohanang isa siya sa mga A-lister na artista at multi-awarded actor, nakasayad pa rin ang mga paa niya sa lupa.

Natanong si Dennis kung ano ang pakiramdam na makasama sa GMA historical series sina Barbie Forteza, Sanya Lopez, David Licauco, at Alden Richards. Tugon ng aktor, “Masarap ‘yung pakiramdam na makatrabaho ‘yung mga superstar, ‘di ba? Feeling mo ka- level ka rin nila.”

O hindi ba, to think na ka-level naman niya ang mga nabanggit, lalo na sina Barbie at Alden, kung stature sa showbiz ang pag-uusapan.

Kung tutuusin nga, mas una pa siyang nakilala bilang artista kaysa mga co-star niya sa serye. Pero iyon na nga, likas kay Dennis ang kababang loob.

“Lalo na masarap makatrabaho ang isang Alden Richards, first time ko siyang nakatrabaho. Makikita mo talaga ‘yung passion niya every time magka-eksena kayo, ‘yung energy niya, energy level niya, parang hindi siya napapagod eh.

“Talagang ibang klase rin si Alden Richards,” bulalas ni Dennis.

“At siyempre, si Barbie at David, lalo na si Sanya. 

“Masaya ako na makatrabaho sila ulit dahil nakatrabaho ko na sila noon, pero habang lumilipas ‘yung panahon talagang nakikita mo ‘yung growth nila. 

“Si David, lalo na, talagang lagi rin niyang ini-improve ‘yung sarili niya, malaking improvement na ‘yung nakita ko sa kanya simula noon hanggang ngayon.”

Gumaganap si Dennis bilang Colonel Yuta Saitoh ng Japanese Imperial Army, si Barbie naman bilang si Adelina dela Cruz, si Samya si Teresita Borromeo, si David si Hiroshi Tanaka, at si Alden si Eduardo dela Cruz.