HATAW! D'yaryo ng Bayan hatawtabloid.com
ARESTADO ang pitong personalidad sa droga at isang lumabag sa pag-iingat ng hindi lisensiyadong baril sa ika-5 araw na Simultaneous Anti-Criminality Law Enforcement Operation (SACLEO) ng Bulacan PNP sa lalawigan hanggang kahapon.
Sa ulat na ipinadala kay PColonel Satur L. Ediong, OIC ng Bulacan PPO, sa buy-bust operations na isinagawa ng Station Drug Enforcement Unit (SDEU) ng Bocaue, Plaridel, at San Ildefonso MPS ay naaresto ang pitong tulak ng iligal na droga.
Nasamsam sa mga operasyon ang labinlimang plastic sachet ng hinihinalang shabu na may Standard Drug Price (SDP) na Php 167,440, iba’t ibang drug paraphernalia, at buy-bust money.
Isa namang 52-anyos na lalaking suspek ang inaresto ng mga operatiba ng Pandi MPS dahil sa krimeng grave threat, paglabag sa R.A. 10591 at B.P. 6 na naganap sa Brgy. Malibong Matanda, Pandi, Bulacan, bandang alas-11:40 kamakalawa ng gabi.
Narekober mula sa suspek ang isang kalibre 38. revolver na Smith at Wesson Springfield mass, apat na bala, at isang kutsilyo habang inihahanda na ang reklamong kriminal para sa paglabag sa RA 10591 (Illegal Possession of Firearms and Ammunitions) para sa pagsasampa sa korte laban dito. (MICKA BAUTISTA)
