School service, tricycle na ‘overloaded’ ng mga estudyante kakastigohin ng LTO

BINALAAN ni Transportation Office (LTO) Chief, Assistant Secretary Atty. Vigor D. Mendoza II ang mga school service at tricycles na mahuhuling magsasakay nang overloaded para sa pagbubukas ng klase ngayong Lunes.

Ayon kay Mendoza, intasan na niya ang lahat ng Regional Directors at District Office head na makipag-ugnayan sa kani-kanilang local government units (LGUs) para sa tulong na maibibigay ng ahensiya ngayong pasukan.

Aniya, mahigpit na imo-monitor ng mga tauhan ng LTO ang mga school service, tricycles, at iba pang sasakyan na magsasakay ng mga estudyante nang higit sa kanilang pinapayagang kapasidad.

“We also have to check on motor vehicles overloaded with students because that is very risky and leads to road accidents,” giit ni Mendoza.

Ang kautusan ay alinsunod sa tagubilin ni Department of Transportation (DOTr) Secretary Jaime J. Bautista na tiyakin ang kaligtasan ng lahat ng gumagamit ng kalsada patungo sa iba’t ibang paaralan sa buong bansa para sa pagbubukas ng klase.

“Your LTO, through our personnel on the ground, will assist in the smooth flow of traffic and ensure compliance of motorists on courtesy and discipline on the road,” dagdag ng opisyal. (ALMAR DANGUILAN)