WALTERMART FREE CHARGING STATION.

Nagsilbing cellphone and battery pack charging station ang WalterMart Supermarket sa E. Rodriguez, Sr., Avenue, Barangay Kalusugan, Quezon City para sa mga residente ng Barangay Damayang Lagi dahil hanggang sa kasalukuyan ay walang koryente sa komunidad.

Ayon sa security guard na si Jimmy Cannu, inihandog ito ng WalterMart Supermarket sa ilalim ng kanilang community service program bilang tulong sa mga biktima ng bahang dulot ng habagat na pinalakas ng bagyong Carina nitong nakaraang linggo sa nasabing komunidad.

Ayon kay SG Cannu, mahigpit na ipinag-utos ng management na alalayan at bigyan ng direksiyon ang mga residenteng makiki-charge ng kanilang mga cellphones at battery pack na posibleng tumagal hanggang sa Lunes o hanggang magkaroon ng koryente sa lugar.

Makikita sa larawan ang mga residente kasama ang kanilang mga anak na matiyagang naghihintay na ma-fully charged ang kanilang cellphones at battery pack sa nasabing sangay ng WalterMart Supermarket. (Kuha ni GLORIA GALUNO)