HATAW! D'yaryo ng Bayan hatawtabloid.com
HINDI alintana ng kapulisan sa Bulacan ang malakas na ulan at baha dulot ng bagyong Carina at patuloy silang tumupad sa tungkulin nang sunod-sunod nilang arestuhin ang sampung wanted na kriminal sa lalawigan kahapon.
Sa mga ulat na ipinadala kay PColonel Relly B. Arnedo, provincial director ng Bulacan PPO, ang sampung katao na pinaghahanap dahil sa iba’t ibang krimen at paglabag sa batas ay magkakasunod na inaresto ng tracker team ng 1st Provincial Mobile Force Company (PMFC), Sta. Maria MPS, Criminal Investigation and Detection Group (CIDG, Bulacan), Pulilan MPS, Bocaue MPS, Guiguinto MPS, at San Miguel MPS.
Ang mga naaresto ay kinilala sa mga pangalang alyas Lyn, 51, arestado dahil sa Bouncing Check Law (BP 22); alyas Mark, 34, at alyas Jan, 29, para sa Reckless Imprudence Resulting in Damage to Property; alyas Domingo, 52, kasong Acts of Lasciviousness; alyas Michael, 39; at alyas Alvin, 34, para sa Karahasan Laban sa Kababaihan at kanilang mga anak; alyas Del, 25, para sa paglabag sa Comelec Resolution no. 10918; alyas King, 40, para sa Lascivious Conduct (RA 7610); alias Jet, 40, para sa Attempted Homicide; at alyas Jose, 54, para sa The Special Protection of Children Against Abuse, Exploitation and Discrimination Act. (RA 7610).
Ang mga naarestong akusado ay kasalukuyang nasa kustodiya ng kani-kanilang arresting unit/station para sa kaukulang disposisyon.
Ayon kay Police Colonel Arnedo, ang mandato ng Regional Director ng PRO3 na si PBGeneral Jose S. Hidalgo Jr., ay kahalintulad ng walang patid na opensiba laban sa ilegal na droga ng Bulacan PNP, walang humpay na pagtugis sa mga personalidad sa droga, at mga lumalabag sa batas na nagmumula ng mahusay na solusyon laban sa krimen. (MICKA BAUTISTA)
