HATAW! D'yaryo ng Bayan hatawtabloid.com
PATAY nang matagpuan sa loob ng abandonadong beetle ang magkapatid na batang lalaki na huling nakasama ng ina noong Sabado ng tanghali sa Santo Tomas, Pampanga.
Napag-alaman na edad lima at anim ang mga biktima na natagpuan ang mga bangkay sa isang sirang kotse na nakaparada sa Barangay Moras dela Paz.
Sinasabing isang concerned citizen ang nakaamoy ng masangsang sa lugar hanggang nadiskubre ang bangkay ng magkapatid sa loob ng sasakyan na nakaparada sa layong 500 metro mula sa kanilang bahay.
Ayon sa ina ng mga bata, pinakain pa niya noong tanghali ang dalawa at hindi na niya nakita kinagabihan ngunit hindi siya nag-aalala dahil sa pag-aakalang nasa ama ang mga bata na nakatira sa ibang barangay.
Nalaman ng ina na nawawala ang kanyang mga anak nang madiskubre ang mga bangkay sa kotse.
Itinanggi ng ama na kinuha niya ang mga bata at sinabing noong nakaraang buwan pa niya huling binisita ang mga anak at hindi rin umano niya kukunin nang hindi alam ng ina.
Nagsasagawa ng imbestigasyon ang mga awtoridad pero wala pa umano silang nakikitang foul play sa nangyaring insidente.
Ayon kay P/Capt. Jester Calis, hepe ng Santo Tomas Municipal Police Station, napansin niya na nangangamoy na ang mga bangkay kaya malamang na matagal na silang patay. (MICKA BAUTISTA)
