HATAW! D'yaryo ng Bayan hatawtabloid.com
ANG REGIONAL police director ng Central Luzon ay nasa ilalim ng imbestigasyon kasunod ng pagkakadiskubre sa ilegal na Philippine Offshore Gaming Operator (POGO) hubs sa Bamban, Tarlac at Porac, Pampanga,
Ayon kay Philippine National Police chief Police General Rommel Francisco Marbil, iimbestigahan nila ang regional director hinggil sa mga ulat na hindi nito naaaksiyunan ng maayos ang mga nadiskubreng POGO hubs na naglagay sa kanya ng pananagutan.
Matatandaang sa isang pahayag nitong katapusan ng linggo, binalaan ni Marbil ang mga pulis na haharap sila sa mga aksyong pandisiplina kung mapatunayang sangkot sa operasyon ng mga ilegal na POGO.
“Ang patakarang ito ay nagsisilbing paalala: makisali sa mga ilegal na aktibidad, at ikaw ay haharapin nang naaayon,” aniya pa.
Ngunit sinabi ni Marbil na hindi niya sinasabi na ang mga pulis ay “protectors” ng mga ilegal na POGO at ang mga opisyal ng pulisya ay tinanggal sa kanilang mga puwesto dahil sa hinihinalang kawalan ng aksyon.
Sa POGO hub sa Porac, nakita ng pulisya at ng Presidential Anti-Organized Crime Commission (PAOCC) ang mga bagay na ginagamit para sa torture, at ilang device na ginagamit para sa pag-clone ng mga SIM card at para sa pagpapadala ng mga text blast.
Samantala, anim na Chinese POGO workers mula sa ni-raid na POGO hub sa Bamban, Tarlac ang napag-alamang pugante na nahaharap sa mga kaso sa kanilang bansa.
Ang mga Chinese ay may mga warrant of arrest para sa pandaraya, pagpapatakbo ng mga sugal at iba pang krimen. (MICKA BAUTISTA)
