HATAW! D'yaryo ng Bayan hatawtabloid.com
PERSONAL naipinaabot ni Las Piñas City Vice Mayor April Aguilar ang pagkilala at pinuri ang mga nagsipagtapos sa Las Piñas City National Senior High School – Doña Josefa Campus sa idinaos nitong 7th Commencement Exercises sa SM Southmall Events Hall.
Ikinatuwa ni VM Aguilar ang mga tagumpay sa akademiko ng mga nagsipagtapos na estudyante sa naturang paaralan.
Sa nasabing seremonya, tampok ang paggawad ng Mayor Nene Aguilar Academic Excellence Award na mismong si VM Aguilar ang nagkaloob sa mga graduates na pinakamahuhusay sa akademiko.
Ang award ay ipinangalan sa yumaong alkalde, Mayor Vergel “Nene” Aguilar, para kilalanin ang mga estudyanteng nagpamalas ng kanilang hindi matatawarang dedikasyon sa pag-aaral.
Sa kanyang talumpati, malugod na binati ng bise alkalde ang mga nagsipagtapos para sa kanilang ipinamalas na pagsusumikap at sigasig.
Binigyang-diin ni VM Aguilar ang kahalagahan ng edukasyon tungo sa pagkakamit magandang kinabukasan.
Hinikayat ng bise alkalde ang mga estudyante na ipagpatuloy ang kanilang pagpupunyagi upang maging mahusay sa akademiko at magkaroon ng magandang buhay.
Samantala, sa isang video message, ipinaabot ni Mayor Imelda T. Aguilar ang kanyang malugod na pagbati sa mga graduates at binigyang-diin ang pangako ng pamahalaang lungsod na suporta at pagkilala sa academic excellence.
Mahalaga ang pagdalo sa okasyon ng mga nasisiyahang magulang, mga opisyal ng lokal na pamahalaan at panauhin para kilalanin ang tagumpay ng mga graduates.
Naging maayos ang seremonya na nagtapos sa presentasyon ng mga diploma at espesyal na parangal sa mga estudyante para sa mahalagang yugto ng kanilang pag-aaral.
