Aica nais kumawala karanasan sa isang kapitbahay

RATED R
ni Rommel Gonzales

NAGBAHAGI ng kanyang mapait na karanasan ang Vivamax female star na si Aica Veloso nang matanong kung may isang pangit na bahagi ng buhay niya na nais na niyang makawala?

Lahad ni Aica, “Simpleng buhay lang po kasi ‘yung mayroon kami ng family ko noong mga nasa one to ten years old ako.

“And then mayroon po akong ka-compound which is kaibigan din ng family ko.

“Isang araw po wala po kasing tao sa bahay and then siyempre ako wala namang malisya sa akin kaya nang pumasok siya sa bahay namin since kilala siya ng family ko and then kilala naman ang family nila ng family ko.

“Ayun po noong nakaupo po ako naglalaro po ako ng phone ko na bigay po sa akin ng mommy ko, bigla niya pong inilabas ‘yung ‘ano’ niya, ‘yung ari niya sa akin, bigla niya pong inilabas,” rebelasyon pa ni Aica na napahagulgol.

Pagpapatuloy pa ni Aica, “Noong sandaling iyon hindi ko alam kung anong gagawin ko. 

“Tumakbo po ako palabas, hindi ko po alam kung sinong pagsusumbungan ko kasi hindi ko alam kung sinong maniniwala sa akin, kasi lahat ng mga tao sa amin kilala po siya.

“Kilala ng mga official, na funny siya, na nagpapatawa siya sa iba’t ibang tao.

“Gusto ko pong sabihin sa mommy ko pero hindi ko magawa,” patuloy na salaysay ni Aica habang umiiyak.

 “Kasi feeling ko hindi siya maniniwala sa akin.”

Hindi na raw alam ni Aica kung nasaan ang naturang lalaki.

Ang nasabing traumatic na karanasan ang nais ni Aica na “makalaya” mula sa kanyang puso at isipan. May koneksiyon ang tungkol sa pagpapalaya sa proyekto ni Aica sa Vivamax na may pamagat na Kulong na magsisimula ang streaming ngayong May 24.

Mga bida rin dito sina Caris Manzano, JD Aguas, at Jenn Rosa. Ang Kulong ay idinirehe ni Sigrid Polon na artista rin sina Ghion Espinosa at Ralph Engle.