Puganteng Chinese arestado sa ilegal na pag-iingat ng baril

INARESTO ng pulisya ang isang Chinese national dahil sa kasong illegal possession of firearms sa Zaragoza, Nueva Ecija, Lunes ng hapon, 22 Abril.

Dinakip ng Zaragoza Municipal Police Station katuwang ang ibang law enforcement units, si Zhi Jun Li, 44 anyos, kilala rin bilang Samuel Li, negosyante at residente sa Barangay Del Pilar, Zaragoza, Nueva Ecija.

Nahaharap ang akusado sa kasong paglabag sa RA 10591 na ang warrant of arrest ay inisyu ni Judge Ana Marie Co Joson-Viterbo, Presiding Judge, Regional Trial Court (RTC) Branch 24 sa Cabanatuan City, Nueva Ecija.

Napag-alamang nakalista si Li bilang isa sa most wanted persons (MWPs) ng Zaragosa Municipal Police Station.

Kaugnay nito, sinabi ni PRO3 Director P/BGen. Jose S. Hidalgo, Jr., “Ito ay nagpapakita na ang Rehiyon 3 ay hindi ligtas na kanlungan para sa mga kriminal maging ang mga dayuhang pugante at ang buong pulisya ay nagtatrabaho 24/7 upang panatilihing ligtas ang ating mga komunidad mula sa lahat ng mga taong pinaghahanap at may dapat pangutan sa batas.”

(MICKA BAUTISTA)